ନୂଆଦିଲ୍ଲୀ: କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ୍ଗେଙ୍କ ଉତ୍ତରାଖଣ୍ଡ ଗସ୍ତ ପରେ ଘଟିଥିବା କଥିତ ‘ଶୁଦ୍ଧୀକରଣ’ ଘଟଣାକୁ କଂଗ୍ରେସ ଏବେ ବଡ଼ ରାଜନୈତିକ ପ୍ରସଙ୍ଗରେ ପରିଣତ କରିବାକୁ ଉଦ୍ୟମ କରୁଛି। ଅଗଷ୍ଟ ୮ରେ ହାଲ୍ଦ୍ୱାନୀର ରାମଲୀଳା ମଇଦାନରେ ଖଡ୍ଗେ ଏକ ଦଳୀୟ ସଭାକୁ ସମ୍ବୋଧିତ କରିଥିଲେ। ଏହାର ଦୁଇ ଦିନ ପରେ ସେହି ସ୍ଥାନରେ ‘ଶୁଦ୍ଧୀକରଣ ହବନ’ କରାଯାଇଥିବା ନେଇ ବିବାଦ ଦେଖାଦେଇଥିଲା।
ଆହୁରି ପଢନ୍ତୁ :DM Sir Please Build Road: ଚକୋଲେଟ୍ ଦେଲେ, ରାସ୍ତା ବନାଇବାକୁ କହିଲେ… ଚର୍ଚ୍ଚାରେ ଜିଲ୍ଲାପାଳ
ଖଡ୍ଗେ ରାଜ୍ୟସଭାରେ ଏହି ପ୍ରସଙ୍ଗ ଉଠାଇ କହିଥିଲେ ଯେ, ଏହି ଘଟଣା ତାଙ୍କୁ ଦଳିତ ହୋଇଥିବାରୁ ଅପମାନିତ କରିଛି। ଏହାକୁ କଂଗ୍ରେସ ଜାତିଗତ ଭେଦଭାବ ଓ ଅସ୍ପୃଶ୍ୟତାର ଉଦାହରଣ ବୋଲି ଅଭିଯୋଗ କରିଛି। ଅନ୍ୟପକ୍ଷରେ ବିଜେପିଏହି ଘଟଣାରୁ ନିଜକୁ ଦୂରେଇ ରଖିଛି। ବିଜେପି ନେତାମାନେ କହିଛନ୍ତି, ଏହି କାର୍ଯ୍ୟକ୍ରମ ସହ ଦଳର କୌଣସି ସମ୍ପର୍କ ନାହିଁ। ଆୟୋଜକମାନେ ମଧ୍ୟ ଜାତିଗତ କାରଣକୁ ଅସ୍ବୀକାର କରି ମଇଦାନରେ ମଇଳା ପଡ଼ିଥିବାରୁ ସଫା କରାଯାଇଥିବା କହିଛନ୍ତି। ପରେ କଂଗ୍ରେସ ଏହାକୁ କେବଳ ଖଡ୍ଗେଙ୍କ ଅପମାନର ପ୍ରସଙ୍ଗ ଭାବେ ନ ରଖି ଦଳିତ ସମ୍ମାନ, ସାମାଜିକ ସମାନତା ଓ ସମ୍ବିଧାନର ସୁରକ୍ଷା ସହ ଯୋଡ଼ିଛି।ଦଳର ଉତ୍ତରାଖଣ୍ଡ ପ୍ରଭାରୀ କୁମାରୀ ଶୈଳଜା ଅଭିଯୋଗ କରିଛନ୍ତି ଯେ, ଶୁଦ୍ଧୀକରଣ କରିଥିବା ଲୋକଙ୍କ ବିରୋଧରେ ମାମଲା ନ କରି ଏହାକୁ ନେଇ ପ୍ରଶ୍ନ ଉଠାଇଥିବା ରାହୁଲ ଗାନ୍ଧୀଙ୍କ ବିରୋଧରେ ଏଫ୍ଆଇଆର୍ କରାଯାଇଛି। କଂଗ୍ରେସ ଏହାକୁ ଦଳିତ ଓ ସମ୍ବିଧାନ ବିରୋଧୀ ମାନସିକତାର ଉଦାହରଣ ବୋଲି କହିଛି।
ଆହୁରି ପଢନ୍ତୁ :Mud Wall Collapses ଲଗାଣ ବର୍ଷାରେ କାନ୍ଥ ଭୁଶୁଡ଼ି ମହିଳାଙ୍କ ମୃତ୍ୟୁ
ଏହି ମାମଲାରେ ଅଗଷ୍ଟ ୩୧ରେ ଉତ୍ତରାଖଣ୍ଡ ପୁଲିସ ରାହୁଲ ଗାନ୍ଧୀଙ୍କ ବିରୋଧରେ ଏଫ୍ଆଇଆର୍ କରିବା ପରେ ବିବାଦ ଆହୁରି ତୀବ୍ର ହୋଇଛି। ତାଙ୍କ ବିରୋଧରେ ଭାରତୀୟ ନ୍ୟାୟ ସଂହିତାର କେତେକ ଧାରା ସହ ଅନୁସୂଚିତ ଜାତି ଓ ଅନୁସୂଚିତ ଜନଜାତି ନିର୍ଯାତନା ନିବାରଣ ଆଇନର ଧାରା ଲଗାଯାଇଛି। କଂଗ୍ରେସ ଏହି ଘଟଣାକୁ ନେଇ ଆନ୍ଦୋଳନ ଆରମ୍ଭ କରିଛି। ଅଗଷ୍ଟ ୩୧ରେ ଦଳର ୨୦୦ରୁ ଅଧିକ କର୍ମୀ ଡେରାଡୁନରେ ପୁଲିସ ମୁଖ୍ୟାଳୟ ଅଭିମୁଖେ ମାର୍ଚ୍ଚ କରି ରାହୁଲଙ୍କ ବିରୋଧରେ ହୋଇଥିବା ଏଫ୍ଆଇଆର୍ ପ୍ରତ୍ୟାହାର ଓ ଶୁଦ୍ଧୀକରଣ କରିଥିବା ଲୋକଙ୍କ ବିରୋଧରେ ମାମଲା ଦାବି କରିଛନ୍ତି। ଆସନ୍ତା ୨୦୨୭ ଉତ୍ତରାଖଣ୍ଡ ବିଧାନସଭା ନିର୍ବାଚନ ପୂର୍ବରୁ ଏହି ବିବାଦ ଦଳିତ ଭୋଟ୍କୁ ନେଇ ବଡ଼ ରାଜନୈତିକ ପ୍ରସଙ୍ଗରେ ପରିଣତ ହେବାର ସମ୍ଭାବନା ରହିଛି।
