ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୦୨୯ ପୂର୍ବରୁ ମହିଳା ସଂରକ୍ଷଣ ଲାଗୁ କରିବାକୁ ସଂସଦର ସ୍ବତନ୍ତ୍ର ଅଧିବେଶନ ଡକାଇଥିବା ବେଳେ କଂଗ୍ରେସ ଏହାକୁ ଗୁରୁତ୍ବପୂର୍ଣ୍ଣପୂର୍ଣ୍ଣ ବିଧାନସଭା ନିର୍ବାଚନ ସମୟରେ ରାଜନୈତିକ ଫାଇଦା ହାସଲ ପାଇଁ ବିଜେପିର ଚାଲ୍ ବୋଲି ଅଭିଯୋଗ କରିଛି। କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖି ଏ ନେଇ ଚିନ୍ତା ପ୍ରକଟ କରିଛନ୍ତି।
ଏପ୍ରିଲ ୧୧ ତାରିଖରେ ଲେଖିଥିବା ଚିଠିରେ ଖଡ଼ଗେ ନାରୀ ଶକ୍ତି ବନ୍ଦନ ଅଧିନିୟମ, ୨୦୨୩ ଉପରେ ଆଲୋଚନା କରିବା ପାଇଁ ଏପ୍ରିଲ ୧୬ରୁ ପ୍ରସ୍ତାବିତ ତିନିଦିନିଆ ସ୍ୱତନ୍ତ୍ର ଅଧିବେଶନ ଉପରେ ପ୍ରଧାନମନ୍ତ୍ରୀଙ୍କ ଚିଠିର ଜବାବ ଦେଇଛନ୍ତି। ରାଜ୍ୟସଭାରେ ବିରୋଧୀ ଦଳ ନେତା କହିଛନ୍ତି, ସଂସଦର ସ୍ୱତନ୍ତ୍ର ଅଧିବେଶନ ନେଇ ମୁଁ ଆପଣଙ୍କ ଚିଠି ପାଇଛି। ସେପ୍ଟେମ୍ବର ୨୦୨୩ରେ ସର୍ବସମ୍ମତିକ୍ରମେ ଏହି ଆଇନ ପାରିତ ହୋଇଛି ଏବଂ କଂଗ୍ରେସ ଏହାର ତୁରନ୍ତ କାର୍ଯ୍ୟକାରିତା ପାଇଁ ଚାପ ପକାଇଥିଲା। ତେବେ ସେ ବିଳମ୍ବ ଓ ବର୍ତ୍ତମାନର ଆଭିମୁଖ୍ୟ ଉପରେ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି, ସେବେଠାରୁ ୩୦ ମାସ ବିତିଗଲାଣି ଏବଂ ବର୍ତ୍ତମାନ ଆମକୁ ବିଶ୍ୱାସକୁ ନ ନେଇ ଏହି ସ୍ୱତନ୍ତ୍ର ଅଧିବେଶନ ଡକାଯାଇଛି। ଆପଣଙ୍କ ସରକାର ହେବାକୁ ଥିବା ସୀମା ନିର୍ଦ୍ଧାରଣ ବିଷୟରେ କୌଣସି ବିବରଣୀ ପ୍ରକାଶ ନ କରି ପୁନର୍ବାର ଆମର ସହଯୋଗ ଲୋଡିଛନ୍ତି। ସୀମା ନିର୍ଦ୍ଧାରଣ ଓ ଅନ୍ୟାନ୍ୟ ଦିଗର ସବିଶେଷ ବିବରଣୀ ବିନା ଏହି ଐତିହାସିକ ଆଇନ ଉପରେ କୌଣସି ଉପଯୋଗୀ ଆଲୋଚନା କରିବା ଅସମ୍ଭବ ହେବ।
ଆହୁରି ପଢ଼ନ୍ତୁ: Odisha Janata Congress Office ଓଡ଼ିଶା ଜନତା କଂଗ୍ରେସର ରାଜ୍ୟ କାର୍ଯ୍ୟାଳୟ ଉଦ୍ଘାଟିତ
ସେ କହିଛନ୍ତି, ଆପଣ ନିଜ ଚିଠିରେ ଉଲ୍ଲେଖ କରିଛନ୍ତି ଯେ ଆପଣଙ୍କ ସରକାର ଏ ସମ୍ପର୍କରେ ରାଜନୈତିକ ଦଳଗୁଡ଼ିକ ସହ ଆଲୋଚନା କରିଛନ୍ତି। କିନ୍ତୁ ମୁଁ ଦୁଃଖିତ ଯେ ଏହା ସତ୍ୟର ବିରୁଦ୍ଧାଚରଣ କରୁଛି। କାରଣ ସମସ୍ତ ବିରୋଧୀ ଦଳ ସରକାରଙ୍କୁ ଅନୁରୋଧ କରୁଛନ୍ତି ଯେ ଚଳିତ ପର୍ଯ୍ୟାୟ ନିର୍ବାଚନ ଶେଷ ହେବା ପରେ ୨୦୨୬ ଏପ୍ରିଲ ୨୯ ତାରିଖରେ ସମ୍ବିଧାନ ସଂଶୋଧନ ଉପରେ ଆଲୋଚନା କରିବାକୁ ସର୍ବଦଳୀୟ ବୈଠକ ଡକାନ୍ତୁ।
ଅଧିବେଶନର ସମୟ ଚିନ୍ତା ବଢ଼ାଇଛି ବୋଲି ଖଡ଼ଗେ ଯୁକ୍ତି କରିଛନ୍ତି। ସେ କହିଛନ୍ତି, ଚାଲିଥିବା ରାଜ୍ୟ ନିର୍ବାଚନ ସମୟରେ ଏକ ସ୍ୱତନ୍ତ୍ର ବୈଠକ ଡାକିବା କଂଗ୍ରେସର ଏହି ବିଶ୍ୱାସକୁ ଦୃଢ କରୁଛି ଯେ ସରକାର ପ୍ରକୃତ ମହିଳା ସଶକ୍ତୀକରଣ ପରିବର୍ତ୍ତେ ରାଜନୈତିକ ଫାଇଦା ପାଇଁ ଆଇନ କାର୍ଯ୍ୟକାରୀ କରିବାରେ ତତ୍ପରତା ଦେଖାଉଛନ୍ତି। ପୁନଃ ସୀମା ନିର୍ଦ୍ଧାରଣ ସହ ଜଡ଼ିତ ପ୍ରସ୍ତାବିତ ସାମ୍ବିଧାନିକ ସଂଶୋଧନ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଉପରେ ପ୍ରଭାବ ପକାଇବ ବୋଲି ଖଡ଼ଗେ ଅଭିଯୋଗ କରିଛନ୍ତି। ଯଦି ସ୍ୱତନ୍ତ୍ର ବୈଠକ ‘ଆମ ଗଣତନ୍ତ୍ରକୁ ମଜବୁତ କରିବା’ ଏବଂ ‘ଏକାଠି ଆଗକୁ ବଢ଼ିବା, ସମସ୍ତଙ୍କୁ ସାଙ୍ଗରେ ନେବା’ ପାଇଁ ଉଦ୍ଦିଷ୍ଟ, ତେବେ ମୁଁ ପରାମର୍ଶ ଦେବି ଯେ ସରକାର ଏପ୍ରିଲ ୨୯ ପରେ ଯେକୌଣସି ସମୟରେ ସୀମା ନିର୍ଦ୍ଧାରଣ ପ୍ରସଙ୍ଗ ଉପରେ ଆଲୋଚନା କରିବା ପାଇଁ ଏକ ସର୍ବଦଳୀୟ ବୈଠକ ଡକାନ୍ତୁ, ଯାହା ନାରୀ ଶକ୍ତି ବନ୍ଦନ ଅଧିନିୟମରେ ସଂଶୋଧନ ସହିତ ଜଡିତ। କଂଗ୍ରେସ ଏହା ମଧ୍ୟ କହିଛି ଯେ ଆଇନ ସହ ଜଡିତ ସୀମା ନିର୍ଦ୍ଧାରଣ ଅଭ୍ୟାସ ଗମ୍ଭୀର ପରିଣାମ ଆଣିପାରେ।
