ନୂଆଦିଲ୍ଲୀ: ୨୦୨୬ ବିଧାନସଭା ନିର୍ବାଚନ ପାଇଁ ପ୍ରଚାର ଏବେ ଜୋରସୋରରେ ଚାଲିଛି। ଏପ୍ରିଲ ୯ରେ ପ୍ରଥମ ପର୍ଯ୍ୟାୟ ଭୋଟ୍ ହେବାର ଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିର୍ବାଚନ ହେବାକୁ ଥିବା ରାଜ୍ୟଗୁଡ଼ିକରେ ପ୍ରଚାର କରୁଛନ୍ତି। ଏହି ଅବସରରେ ଆସାମର ବାରପେଟାରେ ଏକ ରାଲିକୁ ସମ୍ବୋଧିତ କରି ସେ ସୋମବାର ମହିଳା ସଂରକ୍ଷଣ ବିଲ୍କୁ ସମର୍ଥନ କରିବାକୁ ସମସ୍ତ ରାଜନୈତିକ ଦଳକୁ ଅନୁରୋଧ କରିଛନ୍ତି। ସେ କହିଛନ୍ତି, ମହିଳାଙ୍କ ଅଧିକାରକୁ ମଜବୁତ କରିବା ପାଇଁ ଏହି ପଦକ୍ଷେପ ନିଆଯାଇଛି। ସର୍ବସମ୍ମତିକ୍ରମେ ଏହି ବିଲ୍ ପାରିତ ହେବା ପାଇଁ ରାଜନେତାମାନଙ୍କ ଉପରେ ଚାପ ପକାଇବାକୁ ସେ ମହିଳା ଭୋଟରମାନଙ୍କୁ ନିବେଦନ କରିଛନ୍ତି।ତେଣେ ତାମିଲନାଡ଼ୁରେ ପ୍ରଚାର କରୁଥିବା ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ବର୍ଦ୍ଧିତ ସମର୍ଥନ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଲୋକପ୍ରିୟତାକୁ ଦର୍ଶାଇ ବିଜେପି ନେତୃତ୍ୱାଧୀନ ମେଣ୍ଟ କ୍ଷମତାକୁ ଆସିବ ବୋଲି ଦୃଢ଼ତା ପ୍ରକାଶ କରିଥିଲେ। କେନ୍ଦ୍ରମନ୍ତ୍ରୀ ଜି କିଷନ ରେଡ୍ଡୀ ସୋମବାର ତାମିଲନାଡୁର ଅବିନାଶୀ ନିର୍ବାଚନମଣ୍ଡଳୀରେ ବିଜେପି ପ୍ରାର୍ଥୀ ତଥା କେନ୍ଦ୍ର ରାଷ୍ଟ୍ରମନ୍ତ୍ରୀ ଏଲ ମୁରୁଗାନଙ୍କ ପାଇଁ ପ୍ରଚାର କରି କହିଛନ୍ତି ଯେ, ଭୋଟରମାନେ ବଂଶବାଦ ରାଜନୀତି ଅପେକ୍ଷା ବିକାଶକୁ ପସନ୍ଦ କରନ୍ତି।
ଆହୁରି ପଢନ୍ତୁ;🔴 LIVE News Updates 2026 April 06: ବାହାର ରାଜ୍ୟର ପୁରୁଣା ବାଣିଜ୍ୟିକ ଗାଡ଼ି ଚଳପ୍ରଚଳ ଉପରେ କଟକଣା: ରେଭେନ୍ସା, ଉତ୍କଳ ସହ ୧୪ ବିଶ୍ବବିଦ୍ୟାଳୟ ନିମନ୍ତେ କୁଳପତି ନିଯୁକ୍ତ: ବିଜେଡିରୁ ଭଦ୍ରକ ଜିଲ୍ଲାର ରାଜ୍ୟ ପରିଷଦ ସଦସ୍ୟ ମଞ୍ଜୁଲତା ମଣ୍ଡଳ ଓ ମୁକ୍ତିକାନ୍ତ ମଣ୍ଡଳ ନିଲମ୍ବିତ:
ୟୁନିଫର୍ମ ସିଭିଲ୍ କୋଡ୍ (ୟୁସିସି) ଏବଂ ‘ଏକ ଦେଶ, ଏକ ନିର୍ବାଚନ’ ପ୍ରସ୍ତାବ ଉପରେ ଗମ୍ଭୀର ଓ ସକାରାତ୍ମକ ଆଲୋଚନା ଚାଲିଛି ବୋଲି ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି। ବିଜେପିର ପ୍ରତିଷ୍ଠା ଦିବସ ଅବସରରେ ଦଳୀୟ କର୍ମୀମାନଙ୍କୁ ଆଭାସୀ ସମ୍ବୋଧିତ କରି ମୋଦୀ କହିଛନ୍ତି ଯେ, ସରକାର ଉଭୟ ପ୍ରସଙ୍ଗରେ ସକାରାତ୍ମକ ଦିଗରେ ଗତି କରୁଛନ୍ତି। ‘ଏକ ଦେଶ, ଏକ ନିର୍ବାଚନ’ ପ୍ରସ୍ତାବ ଲୋକସଭା ଓ ବିଧାନସଭା ନିର୍ବାଚନକୁ ସମକାଳୀନ କରିବାକୁ ଚେଷ୍ଟା କରୁଥିବାବେଳେ ୟୁସିସି ବିବାହ, ପୋଷ୍ୟ ସନ୍ତାନ ଗ୍ରହଣ ଏବଂ ଉତ୍ତରାଧିକାର ଭଳି ପ୍ରସଙ୍ଗରେ ଏକ ସାଧାରଣ ଆଇନ ପ୍ରଣୟନ କରିବାକୁ ଲକ୍ଷ୍ୟ ରଖିଛି। ବିଜେପିର ରେକର୍ଡ ଉପରେ ଆଲୋକପାତ କରି ମୋଦୀ ‘ପୁରୁଣା ଉପନିବେଶବାଦୀ ଯୁଗର ଆଇନକୁ ଉଚ୍ଛେଦ, ନୂତନ ସଂସଦ ଭବନ ନିର୍ମାଣ, ଆର୍ଥିକ ଦୁର୍ବଳ ବର୍ଗଙ୍କ ପାଇଁ ୧୦ ପ୍ରତିଶତ ସଂରକ୍ଷଣ, ତିନି ତଲାକ ଉପରେ ନିଷେଧାଦେଶ, ନାଗରିକତା ସଂଶୋଧନ ଆଇନ ଓ ଅଯୋଧ୍ୟାରେ ରାମ ମନ୍ଦିର ଭଳି ପଦକ୍ଷେପ ତାଲିକାଭୁକ୍ତ କରିଛନ୍ତି।
